انا برسمك خطوط خطوط
عنين
شعر
وشفتين
و خصلتين على الجبين
و البحر يرمى على الشطوط ألوان بتنشع عل الورق
أزرق ... بنفسج ... فسدقى ... اسود غطيس
اما القمر
حطيته جنبك
فاكتمل
اصبح عريس
انا برسمك
وحشانى فى السفر البعيد
بينك وبينى طيارات
وارسم دموعك جوا سلك التليفونات
ولما اعود
هدوب فى ضحكه غمازاتك عل الخدود
و ارسم فى أودتك شمعدان
ارسم لهيب الشمع بالورق المفضّض
تتنطط الالوان
ألقى السما فوق القماش
متلونه بالوان جواش
افرح انا
واحط شمس كبيره فى الناحيه الشمال
و زهريات الورد فى الناحيه اليمين
و سندوتش الجبنه فى ايدين العيال
و عينيكى وسط اللوحه بتقول لى ... باحبّك
تتجنّن الفرشه فى إيدى و ارسمك
على قيشانى الحمّامات
و ايديكى بترغّى الصابون فوق البدن
و الميّه تنزل فوق نهودك تشهقى
أشهق معاكى
و ارسمك فوق السرير
و اطفّى نور الأوده بالقلم الرصاص
أمين حداد سبتمبر 1984
5 التعليقات:
كويس
بس أعتقد الاختيار ممكن يكون أعلى من كده
تحياتى
نورتى المدونه يا عين
لولا اختلاف الاذواق لبارت السلع
اناشايف ان القصيده عاليه اوى
اول مرة اقرا لامين حداد
الصور جديده
والخيال
مترابط
فى صور تحفه
القمر حطيته جنبك
اكتمل
اصبح عريس
وبعدين بيقول
ارسم دموعك جوا سلك التلفونات
ارسم فى اودتك شمعدان
عارفه اودتها دى اللى هيا ايه
اللى هيا لوحه الرسم
كل ده هوا بيتكلم عن اللوحه
ولما بيقول
عنيكى وسط الوحه
بتقولى بحبك
اطفى نور الاوده بالقلم الرصاص
اقريها تانى
جامده اوى يا عمران التشبيهات والصور اللى فيها حلوه واوى وزى ما انتى بتجيد اختيار الكلمات فى كتاباتك كمان بتجيد اختيار القصائد اللى تقراها وسلام كبير ليك ولكف كف الكبير
ههههههههههههههههههههه
خدعتنا يا اخي
اولا كنت فاكرها بتاعتك و قلت ايه الحلاوة دي, طلعت منقولة
ثانيا قلت اشطة الموضوع سخن اكتر من اللازم, فطفا النور و خلصت القصيدة
ثالثا الحوار كله طلع اونطة و جوا لوحة
ماشي يا عمنا
علينا واحد .... بس مردودالك ان شاء الله
ارسم دموعك جوا سلك التلفونات - اطفى نور الاوده بالقلم الرصاص
يا عيني
ferekico
انا اتصدمت برده اول ما قريتها
القصيده تحفه يا باشا
ايه اللى هوا عمله ده انا اول مره اسمع عن امين حداد
ده وبعدين ده المفروض انها مكتوبه 84
يعنى عصر الركود الادبى
انا بقول دى اكيد غلطه مطبعيه
ماسك الحكايه بطريقه احترافيه اوى
مش عاجبه الانسه عين
إرسال تعليق