احمد العايدى

لونتِك
سما من عيني
كونتِك
مرمر كامل
شديتِك
ملو دراعي
وادْيتِك
وانا مش واعي
باتمنى وعارف ردِك
لو بنتِك
تنفع بنتي
توهانِك وسط بحورك
والبر مهوش براكي
تستني لإمتى
حضورك
وتعيشي كأني
معاكي
عطشان والميه
بتبعد
وأنا لسا بامد
جدوري
الوِش خلاص
بقى نـَفْـسه
أنا زيك
لابس دوري
يا عبيطة
العشق عبيط
مفهوش
قص وتزبيط
العُمر
يا يبقى مقاسِك
على واسع
ليبقى ماسك
يا بلاستك
لكن فلصو
أنا قلبي
خلاص مش
عايزه
لو كنتي ف مرَّة
مكاني
حتلاقي ان انتي
مكانِك
أنا خايف جداً
زيِك
مرعوب
من كتر ما عايزِك
متلبش
لأ. مش عايزِك
...
طب اقولِك
آخر حاجة..
لونتِك
سما من عيني
كونتِك
مرمر كامل
شديتِك
ملو دراعي
وادْيتِك
وانا مش واعي
باتمنى وعارف ردِك
لو بنتِك
تنفع بنتي